قصيدة زجلية: تَصْهالْ لْعَمْيانْ

Publié le par abdennour driss

قصيدة زجلية: تَصْهالْ لْعَمْيانْ…
زجل بقلم: عبد النور إدريس

ــــــــــــــــــــــــــــــ

شَبْعات لْغيمة من تَّخْمام….ڴالو
والشّاهَدْ ساوى ميزان لَكْلام
والشّرْجم ما يْدخَّل شمس لْيوم
ڴالو …
والشمس ما تًسْخَن غير فْ لَقْصيدة
آه يا وا …
والأرض الجدْبا ما تَحْلا ليّا
وعْنايْتي فْراسي تْبَرْْڴمْ
بْدمعة جايْلَة فْ أرض الله
وراني مْدلّْي عقلي بين الكاف والنون
وضويا فْ عْينيّا
ڴالو لي ادهن السّير
تبكي الصبيان على قْطيع الصُّرّة
ويطيحِ ميزان الذهبْ على حروف الفضة
ڴالو ليّا اكتب بْياضك على سْواد لْمخزن
ترتاح ..
واسْوايع بَدّالا
أو كلمة من غير فمّك ما طَّيَحْ ليك ميزان
وفَمْ لْعيب نابَتْ فيه شوك لْهمزة
شَبْعات لْغيمة من تَّخْمام….
ڴالو …

والمسمار لَّخَّر كايْ جيب الغُمّة
لا السّطر نْفع ملّي كثر لَهْميزْ
ولا لْحرف شاف راسو في لمرايا
ولا همومي نَبْتاتْ جْدورا
صافية لبن والسمن الله يجيبو
آه يا وا …
راني ركبت حاء لْحَرْكَا
قيمتها طَرْحَة زايدة بلا فَرّانْ
تصهال لْخيل نخْوا
وفْ دار لْعز شهوة
من زين ليّام تصهالها
من زين لكْتابا لبْياض
عز ليّام التربيعة
وعز لَفْلاحة لغْيام
ولْخيل زينة الرَّكْبا
اُوصَهْوَتْها لْيوم ما عِنْدْها قيمة
كيف كان لْعَوْد قدّام لْخيمة
أُو برْڴمْ لي …كِيفْ لْبارح …يا لَحْمام
آه يا وا…
شَبْعات لْغيمة من تَّخْمام….
ڴالو …

وعْيات من تهراس الراسْ…

ــــــــــــــ
مكناس في
04/06/2006

Publié dans شعـر

Pour être informé des derniers articles, inscrivez vous :

Commenter cet article